કોરોનાની ત્રીજી લહેરને લઈને નીતિ આયોગે સરકારને ચેતવણી આપી છે. આગામી લહેરમાં 23 ટકા લોકોને હોસ્પિટલની જરૂર પડશે. આ માટે નીતિ આયોગે કેન્દ્ર સરકારને 2 લાખ આઈસીયુ બેડ તૈયાર કરવા સૂચન કર્યુ છે. નીતિ આયોગના સભ્ય વી કે પોલે કહ્યુ છે કે, આ મહિને રોજના 4-5 લાખ કેસ નોંધાઈ શકે છે અને તેમાંથી 23 ટકા લોકોને હોસ્પિટલની જરૂર પડશે.કોરોનાની બીજી વિનાશક લહેર જોયા બાદ હવે આ નિવેદન સામે આવ્યું છે. એપ્રિલ અને મે માં ટોચ પર પહોંચેલી બીજી લહેરમાં પણ રોજના 3 લાખની આસપાસ કેસ નોધાયા હતા ત્યારે હવે કેન્દ્ર સરકારની કોવિડ-19 ટાસ્ક ફોર્સનું નેતૃત્વ કરી રહેલા વીકે પોલે ચેતવણી આપી છે કે સપ્ટેમ્બરમાં ભારતમાં દરરોજ 4-5 લાખ કોરોના વાયરસના કેસ જોવા મળી શકે છે.નીતિ આયોગ દ્વારા આપવામાં આવેલો આ અંદાજ કોવિડ-19 ની સેકન્ડ વેવ કરતા પણ વધારે છે. આ તમામ બાબતોમાં સૌથી ગંભીર બાબત એ છે કે આ વેવમાં ગંભીર-મધ્યમ લક્ષણો ધરાવતા લગભગ 20 ટકા દર્દીઓને હોસ્પિટલમાં દાખલ થવાની જરૂર પડી શકે છે.2 લાખ આઈસીયુ બેડ તૈયાર રાખવાની આ ભલામણ આ વર્ષે એપ્રિલ-જૂન દરમિયાનની બીજી લહેરમાં હોસ્પિટલમાં દાખલ થવાની પેટર્ન પર આધારિત છે. એક અહેવાલ મુજબ 1 જૂનના રોજ સૌથી વધુ 18 લાખ સક્રિય કેસ નોંધાયા હતા. મહત્તમ કેસ ધરાવતા 10 રાજ્યોમાં, કુલ સંક્રમિત દર્દીઓના 21.74 ટકાને હોસ્પિટલમાં દાખલ કરવાની જરૂર પડી હતી, જ્યારે 2.2% લોકોને ICU માં દાખલ કરવા પડ્યા હતા.
(સૂત્રો માંથી પ્રાપ્ત માહિતી મુજબ)
(પ્રતિકાત્મક તસ્વીર)
Policy Commission: 4-5 lakh cases can be registered daily in September
