દક્ષિણ ગુજરાત, સૌરાષ્ટ્રના અનેક જિલ્લાઓમાં આગામી પાંચ દિવસ દરમિયાન ભારેથી અતિભારે વરસાદની હવામાન વિભાગ દ્વારા આગાહી કરવામાં આવી છે. ગુજરાતમાં હજુ સુધી ૭.૧૭ ઈંચ સાથે મોસમનો સરેરાશ ૨૧.૬૯% વરસાદ નોંધાઇ ચૂક્યો છે.
હવામાન વિભાગની આગાહી પ્રમાણે સોમવારે સુરત-નવસારી-વલસાડ, ભરૃચ-ડાંગ-તાપી-દમણ-દાદરા નગર હવેલી-અમરેલી-ભાવનગર-ગીર સોમનાથ-દીવ-વડોદરા-નર્મદા-સુરત-નવસારી, મંગળવારે નવસારી-વલસાડ-દમણ-દાદરા નગર હવેલી, ગુરુવારે ડાંગ-નવસારી-વલસાડ-દમણ, શુક્રવારેે ડાંગ-નવસારી-વલસાડ-દમણ-દાદરા નગર હવેલીમાં ભારેથી અતિભારે વરસાદ પડી શકે છે. રાજ્યમાં આ સિવાય અન્યત્ર હળવોથી મધ્યમ વરસાદ પડી શકે છે.
અમદાવાદમાં આજે દિવસ દરમિયાન વાદળછાયું વાતાવરણ રહ્યું હતું અને છેલ્લા કેટલાક દિવસની સરખામણીએ ઉકળાટમાં રાહત અનુભવાઇ હતી. આજે સરેરાશ મહત્તમ તાપમાન ૩૨.૯ અને હવામાં ભેજનું પ્રમાણ ૮૮% નોંધાયું હતું. હવામાન વિભાગની આગાહી પ્રમાણે અમદાવાદમાં આગામી ૩ દિવસ હળવાથી મધ્યમ ઝાપટાં પડી શકે છે.
